Бээжингийн олимпод Камила Валиева үргэлжлүүлэн оролцохоор боллоо
Info@medeelne.mn
2022/02/14
Спортын арбитрын шүүх (CAS) Камила Валиеваг Бээжингийн олимпод үргэлжлүүлэн оролцохыг нь зөвшөөрсөн байна.
Хоёрдугаар сарын 8-нд Оросын сэргээшийн эсрэг агентлаг /РУСАДА/ Валиеваг олимпод оролцох эрхийг нь түр хугацаагаар хассан ч маргааш нь тамирчин гомдол гаргаснаар бэлтгэл сургуулилалт хийх болон тэмцээнд оролцох хориг нь цуцлагдсан байна.
Оросын сэргээшийн эсрэг агентлагийн шийдвэрийг Олон улсын олимпын хороо /ОУОХ/, Дэлхийн сэргээшийн эсрэг агентлаг /WADA/ болон Уран гулгалтын холбоо эсэргүүцэж, Спортын арбитрын шүүхэд гомдол гаргасан. Уг асуудлыг шүүх цахим хуралд дээрх байгууллагуудаас гадна Оросын Олимпын хороо (ROC) болон Камила Валиева өөрөө оролцсон байна.
Хурлаар Валиевагийн сэргээш хэрэглэсэн эсэх, түүний буруутай эсэхийг хэлэлцээгүй аж. Харин түүнийг цаашид тэмцээнд оролцуулах эсэхийг шийдвэрлэх хурал байсан аж.
"Валиеваг тэмцээнээ үргэлжлүүлэхийг зөвшөөрсөн ч энэ нь сэргээш хэрэглээгүй гэсэн үг биш. CAS өөр шийдвэр гаргасан бол сэргээш хэрэглэсэн гэж бас ойлгож болохгүй. Камила насанд хүрээгүй хүүхэд. Бид хууль журмаа хүндэтгэдэг ч энэ эмзэг хэрэгт таамаглалаас зайлсхийх нь чухал" гэж ОУОХ-ны хэвлэлийн төлөөлөгч Марк Адамс хэлжээ.
Маргааш Бээжинд уран гулгалтын богино төрлийн тэмцээн эхэлнэ.
Эргэн сануулахад, арванхоёрдугаар 25-нд Оросын аварга шалгаруулах тэмцээний үеэр өгсөн Валиевагийн сэргээшийн шинжилгээнд хориотой бодис илэрсэн тул Бээжингийн олимпын уран гулгалтын багийн тэмцээний шагнал гардуулах ёслолын ажиллагааг хойшлуулсан юм.
Эх сурвалж: ВВС