АН-ынхан "Хөгжлийн банк"-нд хийсэн шалгалтын бүх материалыг нууцаас гаргахыг шаардлаа
Info@medeelne.mn
2022/03/10
АН-аас өнөөдөр /2022.03.10/ цаг үеийн асуудлаар мэдээлэл хийлээ.
Энэ үеэр АН-ын дэд дарга Ц.Оюундарь "Өнгөрсөн гуравдугаар сарын 4-нд Хөгжлийн банкны асуудлаар олон нийтийн хэлэлцүүлэг зохион байгуулсан. "Хөгжлийн банк"-ны асуудалд АН тодорхой байр суурьтай байгаа. Хөгжлийн банк дээр үүссэн энэ нөхцөл байдал бол Монгол Улсын цаашдын эдийн засаг, нийгмийн хөгжилд эрсдэл учруулах аюултай. Монгол Улсын ирээдүйд хортой нөхцөл үүсэхээр зүйл юм. Энэ зээлийн эргэн төлөлт, энэ улсыг дампууруулах эрсдэлтэй. Тиймээс энэ асуудал дээр нам харгалзахгүй, он харгалзахгүйгээр энэ эрсдлээс улс орноороо яаж гарах, эдийн засгийн ямар зөв бодлого барьж байж даван туулах вэ гэдэг зүйл дээр АН байр сууриа хатуу илэрхийлж байгаа. Өнгөрсөн хэлэлцүүлгээс тодорхой хэдэн шийдвэр гарсан. "Хөгжлийн банк"-ыг төрийн оролцоотой байгуулах нь эрсдэлтэй. Хууль эрх зүйн шинэчлэлийг хийх ёстой. Зээлтэй аж ахуйн нэгжүүд рүүгээ дайрч, нийтэд нь харлуулж байгаа асуудлаа болих хэрэгтэй" гэв.
Түүнчлэн "Дээрх асуудалтай холбоотойгоор АН-аас Монгол Улсын Засгийн газарт шаардлага хүргүүлж байна. Монгол Улсын "Хөгжлийн банк"-ыг хэд, хэдэн удаа шалгаж байсан. Гэвч шалгалтын дүнг хаалттай хэлэлцэж, нууцад хамааруулсан байна. Энэ асуудлыг нам харгалзахгүйгээр ил тод болгож, бүх онд хийсэн шалгалтын материалуудыг нууцаас гаргаж, эрчимтэй хамтарч ажиллах шаардлагатай байна. Гэтэл 2016 оны шалгалтыг л нууцаас гаргасан нь шударга ёсонд нийцэхгүй. Иймд бүх онд хийсэн шалгалтын дүнг нууцаас гаргахыг шаардаж байна" хэмээн ярилаа.