Үндсэн хуулийн цэц улс төрийн нөлөөнөөс хараат бус үйл ажиллагаа явуулах ёстой ч манай ҮХЦ энэ үүргээ гүйцэтгэж чаддаггүй. Үндсэн хуулийн цэцийн есөн гишүүний гурвыг нь Ерөнхийлөгч, гурвыг нь УИХ санал болгон томилдог учраас Цэц дээр Ерөнхийлөгчийн болон УИХ-ын Тамгын газартай холбоотой маргаан ирсэн тохиолдолд Цэцийн гишүүд өөрийг нь томилсон институцид үйлчилж эхэлдэг тохиолдол өнгөрсөн хугацаанд цөөн биш гарсан байдаг.
Цэцэд төлөөллөө оруулж чадсан улстөрчид хүссэн асуудлаа Үндсэн хуулийн цэц рүү илгээн, маргаан өрнүүлж, өөрт ашигтай хувилбараар шийдүүлэхээр бужигнаан үүсгэж байсны тод жишээ бол 2021 оны Ерөнхийлөгчийн сонгуульд нэр дэвшихээр бүхий л аргыг хэрэглэсэн экс Ерөнхийлөгч Х.Баттулгын дуулиан. Энэ бол Үндсэн хуулийн цэц улстөржиж, улс төрийн хараа хяналтад орлоо гэсэн олон яриа, өгүүлэмжийн зөвхөн нэг тохиолдол. Тиймээс ҮХЦ-ийг улс төрийн нөлөөнөөс ангид болгож, цэвэр шүүхийн хувьд ажиллах зарчмыг энэ өөрчлөлтөөр хийх нь зүйтэй гэж улс төрийн намууд үзжээ.